12-22 may tarixlərində Bakıda keçiriləcək IV İslam Oyunlarında ağır atletika üzrə yarışlarda könüllü qismində iştirak edəcək bir qrup gənc fevralın 18-də Şimal DRES qəsəbəsindəki Ağır Atletika Akademiyasına baş çəkiblər. Onlar burada keçirilən ağır atletika üzrə yeniyetmələr arasında Azərbaycan birinciliyinin gedişi ilə tanış olublar.
Könüllülər yarış zalını gəzib, işlərin gedişi ilə maraqlanıb, təlimçilərlə ünsiyyətdə olaraq məlumat toplayıblar. Onlara ağır atletikanın qaydaları, yarışlar zamanı edilməsi gərəkən işlər, təşkilati məsələlər barədə informasiya verilib.
Təcrübəli mütəxəssislər, beynəlxalq dərəcəli hakimlər və veteranlarımız, həmçinin federasiya rəhbərliyindən şəxslər də könüllülərlə görüşüb, öz tövsiyələrini veriblər.
Könüllülər martın 1-4-də keçiriləcək böyüklər arasında Azərbaycan çempionatında da yarışa gələcək, bilavasitə fəaliyyətlə məşğul olacaqlar. Bu zaman onlar İslam Oyunlarında keçiriləcək ağır atletika turnirinin sınağından keçmiş olacaq, yarış ab-havasını hiss etmək, təcrübə toplamaq imkanı əldə edəcəklər.
