Azərbaycan Ağır Atletika Federasiyası ağır atletika idman növünün təbliğatı, kütləviliyin artırılması istiqamətində çalışmalarını davam etdirir. Bu məqsədlə cənub regionunun tədris müəssisələrinə səfər edilib. Lerik rayonu Piran kəndi tam orta məktəbində şagirdlərə ağır atletika barədə nəzəri biliklər verilib. Məktəbin fiziki tərbiyə müəllimi Allahverdi Şəfiyev bu idman növünün tarixi barədə danışıb, həm sinifdə, həm də idman zalında müxtəlif hərəkətləri nümayiş etdirib. Sonra məktəblilər “Relaks-Lerik” Ağır Atletika İdman Klubunun zalına gedərək peşəkar idmançıların məşq prosesiylə tanış olublar. Məşqçi Elvin Mirzəyev ağır atletikada doğru texnikanı, hərəkətlərin düzgün yerinə yetirilmə yollarını göstərib, müxtəlif tövsiyələrini verib.
Federasiya tədrisdə təbliğat prosesini bundan sonra da davam etdirəcək.
