10-13 noyabr tarixlərində Şimal Dres qəsəbəsindəki Ağır Atletika Akademiyasında ağır atletika üzrə kişilər və qadınlar arasında Azərbaycan Kuboku keçirilir. Yarışda ölkənin bütün regionlarında fəaliyyət göstərən klub və idman cəmiyyətlərindən 200-ə yaxın atlet çıxış edir.
Bu gün yarışların rəsmi açılış mərasimi keçirilib. İlk olaraq zala toplaşanlara Azərbaycan Kuboku barədə məlumat verilib. Qeyd olunub ki, ölkəmizdə ağır atletikanın inkişafı üçün bu cür yüksək səviyyəli yarışların keçirilməsi vacibdir. Yeniyetmə, gənc və daha böyük yaşlı atletlərin təcrübə qazanması, məşqlərdə əldə etdikləri nəticələri nümayiş etdirmək imkanı əldə etməsinin çox böyük əhəmiyyət daşıdığı bildirilib.
Nitq üçün söz ilk olaraq Azərbayan Gənclər və İdman Nazirliyinin məsul işçisi Fəxrəddin İsmayılova verilib. O, yarış iştirakçılarını salamlayaraq Kubokun keçirilmə səviyyəsinin beynəlxalq standartlara uyğun olduğunu, körpücük üzərinə maraqlı mübarizə izlədiklərini bildirib. İsmayılov yarış iştirakçılarına uğurlar arzulayıb.
Daha sonra Azərbaycan Ağır Atletika Federasiyasının baş katibi Rizvan Rəsulov çıxış edib. O, Bu yarışların milli komandanın heyətinin seçilməsi, eyni zamanda böyük potensiala malik atletlərin üzə çıxarılması baxımından Azərbaycan Kubokunun böyük əhəmiyyət kəsb etdiyi bildirib. Rəsulov yarışları rəsmən açıq elan edib.
Azərbaycan Respublikasının Dövlət Himni səslənib.
Yarışlar 50 kq çəki dərəcəsinin A qrupunda mübarizə ilə davam etdirilib.
