Daha bir idmançımız ermənini üstələdi
Polşanın Çexanov şəhərində davam edən yeniyetmə ağırlıqqaldıranlar arasında Avropa çempionatında 77 kq üzrə yarışlara yekun vurulmuşdur. İki idmançımız körpücük üzərinə qalxmışdır.
Təhsil Respublika İdman Mərkəzinin yetirməsi olan Tofiq Allahverdiyev, B qrupunda üçüncü yerə çıxmışdır. Birdən qaldırmada 109 kq çəkini başı üzərinə qaldıran 17 yaşlı gənc ağır atletimiz, təkanla qaldırmada 142 kq çəkinin öhdəsindən gələrək toplamda 251 kq nəticə göstərmişdir. Bu, ona B qrupunda yalnız iki rəqibindən geri qalması imkanı vermişdir.
A qrupunda isə Sumqayıt “Zirvə” İdman Klubunun yetirməsi olan Turan Abdullayev daha yaxşı nəticə göstərmişdir. 16 yaşlı pəhləvanımız birdən qaldırmada hər üç cəhdində uğur qazanaraq dördüncü pillədə qərarlaşmışdır. Çox sevindirici məqamdır ki, ağırlıqqaldırmada güclü rəqib hesab edilən ermənilər bu dəfə də bizdən aşağı pillədə yer aldılar. Razmik Oltestyan 132 kq-ı qaldırsa da, Turan Abdullayev 133 kq sifariş edərək böyük məharətlə ştanqı ram etmişdir.
Gənc atletimiz təkanla qaldırmada da eyni uğuru təkrarlamışdır. Turan erməni rəqibini uzağa buraxmamışdır. Abdullayev 156 kq çəkini qaldıran düşmən atletlə eyni çəkini sifariş verib öhdəsindən gəlmişdir. Toplamda 289 kq-lıq nəticə nümayiş etdirən Azərbaycan idmançısı ermənidən bir kilo və bir pillə üstün olmuşdur.
Təəssüfedici hal isə odur ki, Turan Abdullayevin medal qazanması üçün cəmi bir kiloqramı çatmamışdır. Əvvəlcə 160, sonra isə 161 kq-lıq ştanqı qaldıra bilməyən idmançımız yalnız dördüncü yerlə kifayətlənməli olmuşdur. Üçüncü olan belaruslu Andrey Yupatau 290 kq nəticə göstərmişdir.
Qeyd etmək lazımdır ki, Turan Abdullayevin şəxsi məşqçisi atası Nüsrət Abdullayevdir. Bu mütəxəssis çox təcrübəli və tanınmış çalışdırıcıdır. Nüsrət Abdullayev müstəqllik dövrümüzdə ilk medalçımız olan Asif Məlikovun da məşqçisi olub. Onun nəinki gənc idmançıların yetişməsində, həmçinin ümumilikdə ağır atletikamızın inkişafında rolu olmuşdur. Ümid edirik ki, Turan Abdullayev də atasının təcrübəsindən maksimum yararlanaraq Məlikov kimi zirvələri fəth edəcək, daha böyük turnirlərdə qələbələr qazanacaqdır.
