Böyük Britaniyanın paytaxtında keçirilən XXX Yay Olimpiya Oyunlarının ağır atletika üzrə yarışları başa çatdı. Hər bir çəki dərəcəsində gərgin və maraqlı mübarizəyə şahidlik etdik. Dünyanın diqqət mərkəzində olan Olimpiada bizim üçün bir çox təəssüratlarla yadda qaldı. Xüsusilə, milli komandamızın tarixində ilk dəfə medal qazanması ağır atletikamız üçün müsbət məqam sayıla bilər. Sizi idmançılarımızın Olimpiadadakı çıxışı ilə ayrı-ayrılıqda, daha yaxından tanış edəcəyik.
Sərdar və Əfqan birgə mübarizədə
Ağır atletika yığmamızın daha iki üzvü isə eyni çəkidə mübarizə apardı. Sərdar Həsənov və Əfqan Bayramov Londondakı medal ümidlərimizdən idi. 69 kq çəki dərəcəsində yarışan idmançılarımızdan Sərdar Həsənov “B” qrupunda, Əfqan Bayramov isə “A” qrupunda çıxış etdi.
Sərdarın çıxışını uğurlu saymaq olar. O, birdən qaldırmada 145, təkanla qaldırmada isə 176 kq çəkinin öhdəsindən gələrək toplamda 321 kq-la öz qrupunda 3-cü yeri tutdu. Nəzərə alsaq ki, Həsənovun xeyli müddət sağlamlığıyla bağlı problemlər üzündən yarış təcrübəsi azlığı (məhz bu səbəbdən o, Türkiyədəki Avropa çempionatını buraxmalı olmuşdu) vardı, bu nəticəni qənaətbəxş adlandıra bilərik.
“A” qrupunda yarışan Əfqan Bayramov isə ümidlərimizi doğrultmadı. Təəssüf ki, idmançımız birdən qaldırmada ilk sifariş verdiyi çəki olan 142 kq-ı hər üc cəhddə qaldıra bilmədi və Olimpiadanı sıfır nəticəylə başa vurdu.
Qaldırdığı 321 kq çəki, Sərdar Həsənova ümumi sıralamada 8-ci yeri tutmaq imkanı verdi.
Bürünc medalı 332 kq (152 kq + 180 kq) toplam çəkiylə
rumıniyalı ağır atlet Martin Razvan Konstantin qazandı. Ondan cəmi bir kiloqram artıq qaldıran İndoneziyalı Triyatno Triyatno isə toplamda 333 kq-la (145 kq + 188 kq) gümüş medala sahib çıxdı.
Qızıl medal isə gözlənildiyi kimi, çinli Lin Qinfenqə qismət oldu. O, birdən qaldırmada 157 kq, təkanla qaldırmada 187 kq-ı qaldıraraq toplam 344 kq-lıq nəticə nümayiş etdirdi və Olimpiya çempionu oldu.
