Bu gün Parisdəki dünya çempionatında daha bir idmançımız yarışa qoşulub. Sərdar Həsənov 69 kq çəki dərəcəsinin “B” qrupunda 4-cü olan Əfqan Bayramovdan sonra “A” qrupunda çıxışa başlayıb.
Birdən qaldırmada Sərdar Həsənov əvvəlcə 145 kq-ı başı üzərinə qaldırıb. İkinci yanaşması üçün 150 kq ağırlıq sifariş verən idmançımız onu qaldıra bilməsə də, üçüncü cəhddə bu çəkinin öhdəsindən gələ bildi. Nəticədə o, bu hərəkətdə böyük uğur qazanaraq 4-cü yeri tutdu.
Təkanla qaldırmaya Sərdar uğursuz başladı. O, 176 kq çəkini yalnız ikinci cəhddən qaldıra bildi. 181 kq sifariş verən Həsənov bu ağırlıqda ştanqı qaldıra bilmədi. Nəticədə o bu hərəkətdə 12-ci yeri tutdu.
Sərdar Həsənov toplamda 326 kq (150 kq + 176 kq) nəticə ilə 5-ci yeri tutdu və lisenziya xallarımızı artıra bildi.
Sevindiricidir ki, B qrupunda çıxış etmiş Əfqan Bayramov da ilk onluqda yer ala bilib. Belə ki, o, toplamda 316 kq (138 kq + 178 kq) nəticə ilə dünya çempionatında 10-cu yeri tutub. Bu da lisenziya xalı baxımında xeyrimizə olan nəticədir.
Əlavə edək ki, hər iki idmançımız erməni ağır atletlərini üstələdilər.
Birdən qaldırma – 150 kq
1. 145 kq – cəhd uğurlu oldu
2. 150 kq – cəhd uğursuz oldu
3. 150 kq – cəhd uğurlu oldu
Bu hərəkətdə tutduğu yer – 4
Təkanla qaldırma – 176 kq
1. 176 kq – cəhd uğursuz oldu
2. 176 kq – cəhd uğurlu oldu
3. 181 kq – cəhd uğursuz oldu
Bu hərəkətdə tutduğu yer – 12
Cəmi qaldırdığı çəki – 326 kq (150 kq + 176 kq)
Yekunda tutduğu yer – 5
