Türkiyənin Antalya şəhərində keçirilən ağırlıqqaldırma üzrə Avropa çempionatında uğur qazanmış idmançılarımız – Valentin Xristov və Silviya Angelovanın Azərbaycan Ağır Atletika Federasiyasının rəsmi saytına birgə müsahibəsi:
Valentin Xristov: “Əsl hədəfim böyüklər arasında dünya rekordlarıdır”
– Avropa çempionu oldun. Təəssüratların necədir?
– Hər şey çox gözəldir. Avropa çempionu adını qazanmaq çox gözəl hissdir. Buna nail olduğuma görə çox şadam. Qələbə üçün möhkəm çalışmış, yarışa ciddi hazırlaşmışdım. Əməyimin bəhrəsini gördüm.
– Qızıl medalları qazanmaqla yanaşı, həm də gənclər arasında üç Avropa rekordunu yenilədin...
– Bu rekordları vacib saymıram. Hədəfim gənclər yox, böyüklər arasında dünya və Avropa rekordlarını yeniləməkdir. Hələ gəncəm. Yetərincə gücüm və zamanım var. Çalışıb, bunu da edəcəyəm.
– Çempion olmağında daha kimlərin rolu vardır?
– Biz bir ailəyik. Azərbaycan Ağır Atletika Federasiyasında mənə olan münasibətdən çox razıyam. Prezidentimiz cənab Cahangir Əsgərova, icraçı direktorumuz İsgəndər Əsgərov və məşqçim Zlatan Vanevə dəstəklərinə görə təşəkkür edirəm.
– Azərbaycan xalqına demək istədiyin bir söz varmı?
– Çox sağ olsunlar. Azərbaycan xalqına dərin minnətdarlığımı bildirir, onlara təşəkkür edirəm.
Silviya Angelova: “Azərbaycanı sevirəm!”
– Avropa çempionatında uğurla çıxış edərək bürünc medal qazandın. Təəssüratlarını bizimlə bölüşə bilərsənmi?
– İlk dəfədir belə güclü turnirdə medal qazanıram. Həqiqətən çox sevinirəm. Uzunmüddətli, çətin məşqlərdən sonra bu uğuru qazanmaq xoşdur.
– Bu uğurun davamını gətirmək üçün özündə güc hiss edirsənmi?
– Bəli. Məşqlərimi daha həvəslə davam etdirəcəm. Qələbə qazanmaq xoşdur. Bu hissi yenidən yaşamaq istəyirəm.
– Medal qazanmağında kimlərin əməyi vardır?
– Azərbaycan Ağır Atletika Federasiyasında idmançılara olan münasibət və qayğı yüksək səviyyədədir. Federasiyada rəhbərliyi, xüsusilə də prezidentimiz cənab Cahangir Əsgərova təşəkkür edirəm. Məşqçimə də məni bu uğura daşıdığına görə minnətdaram.
– Azərbaycan xalqına demək istədiyin bir söz varmı?
– Azərbaycanı sevirəm! Bu ölkənin hər bir vətəndaşına təşəkkür edirəm. Onların etimadını gələcəkdə də doğrultmaq üçün əlimdən gələni əsirgəməyəcəm.
