Hacıbaba Əskərovun xatirəsinə həsr olunmuş ağır atletika turniri keçirilib

Dekabrın 27-də AAAF Park Yaşayış Kompleksinin yarış zalında əməkdar məşqçi, beynəlxalq dərəcəli hakim Hacıbaba Əskərovun xatirəsinə həsr olunmuş ağır atletika üzrə Respublika turniri keçirilib. “Zirvə İnternational Sport Clubs” tərəfindən təşkil olunan və bilavasitə keçirilməsi Azərbaycan Ağır Atletika Federasiyası tərəfindən təsdiq edilmiş baş hakimlər kollegiyasına həvalə edilən yarışda qadınlar və kişilərdən ibarət yığma komandaların əsas üzvləri, həmçinin veteran atletlər iştirak ediblər. Qaliblər Sinkleyr cədvəli əsasında müəyyən edilib, mükafatçılara müvafiq dərəcəli diplom, medal və xatirə hədiyyələri təqdim olunub.

Əvvəlcə, yarışların açılış mərasimi keçirilib. İlk olaraq Azərbaycan Respublikası Gənclər və İdman nazirinin müavini, Azərbaycan Ağır Atletika Federasiyasının vitse-prezidenti İsmayıl İsmayılov giriş sözü ilə çıxış edib. Natiq idmançılar, mərhumun ailə üzvləri, həmçinin digər qonaqları salamlayaraq Hacıbaba Əskərovun ölkə ağır atletikasının inkişafındakı böyük rolu barədə danışıb. O, qeyd edib ki, hazırkı nailiyyətlərimizdə bu əməkdar məşqçi, beynəlxalq dərəcəli hakimi xidmətləri əvəzsizdir: “Hacı müəllim böyük bir ağır atlet, məşqçi, hakim, mütəxəssis nəsli yetişdirib və onlar bu gün də idmanımız üçün çalışmaqda davam edirlər. Onun xatirəsini əziz tutmaq, belə gözəl zallarda, belə möhtəşəm yarışlar vasitəsilə yad etmək bizim borcumuzdur. İdmançılar üçün də bu, bir stimul rolunu oynayacaqdır”. İsmayıl İsmayılov daha sonra ölkəmizin 2017-ci ildə əldə etdiyi idman uğur və nailiyyətləri, təşkil olunan yerli və beynəlxalq yarışlar barədə məlumat verib, dövlətimiz tərəfindən uğurla həyata keçirilən idman siyasəti haqda danışıb. Hacıbaba Əskərovun qızı Gülarə Nərimanova da çıxış edərək yarışın təşkilatçılarına təşəkkürünü bildirib: “Mən əminəm ki, atamın ruhu bu yarışı, bu təşkilatçılığı görür və çox şaddır. Hətta deyərdim indi o burada bizimlədir və sevincimizə qoşulur. Hacıbaba Əskərov ağır atletikanın fanatı olub, onun inkişafı üçün əlindən gələni əsirgəməyib, ömrünü bu növə həsr edib. Onun xatirəsinin belə mötəbər yarışla qeyd edilməsi həm ona, həm də ümumilikdə ağır atletikaya nümayiş etdirilən hörmətin nəticəsidir”. Sonda Azərbaycan Ağır Atletika Federasiyasının vitse-prezidenti, “Zirvə” Beynəlxalq İdman Klubunun prezidenti Tofiq Heydərova söz verilib. O, hər kəsi salamlayaraq bu yarışda görməkdən şad olduqlarını qeyd edib: “Azərbaycanda idmana xüsusi dövlət qayğısı var və bu prosesə Cənab Prezident İlham Əliyevin nəzarət etməsi nəticəsində qazanılan uğurlar göz qabağındadır. Ölkə olaraq bütün sahələrdə olduğu kimi, idmanda da dünyanın ən güclüləri sırasında olmağımız aparılan işlərin məntiqi nəticəsidir. 2017-ci ildə Azərbaycan atletləri beynəlxalq yarışlarda 851 medal qazanıblar ki, onların içərisində ağır atletlərin də olması, öz töhfələrini verməsi bizi sevindirir. Ağır atletikamızın 100 ilə yaxın tarixi var. Bu tarixin böyük hissəsində Hacıbaba müəllim Əskərovun adı var. Onun əməyi, gördüyü işlər çox böyükdür. O, nəinki bizim, həm də müəllimlərimizin müəllimi olub. Onu yad etmək, xatirəsini saxlamaq çox vacib məqamdır. Hələ uzaq 90-cı illərdə ümummilli lider Heydər Əliyev biz idmançılarla görüşdə demişdi ki, bu idmanda əməyi olan insanların heç biri kənarda qalmamalıdır. Biz də hazırda həm yaşayan, aktiv fəaliiyət göstərən, həm də dünyasını dəyişmiş mütəxəssislərə diqqətimizi əsirgəməməliyik. Bu yarışın təşkilində məqsəd də ağır atletika ənənələrinin qorunması, idman tariximizə töhfəsini vermiş insanları yad etmək, onlara hörmətimizi nümayiş etdirməkdir. Bu fəaliyyətimizi növbəti illərdə də davam etdirəcəyik”.

AAAF tərəfindən xüsusi plaketlər də təqdim olunub. Hacıbaba Əskərovun qızı Gülarə Nərimanova, zədəli ağır atlet Rüstəm İmanzadə, veteran atlet və ağır atletika mütəxəssisləri Vahid Nəzərov, Yuri Ryabov, Akif Alıyev və Azad Mustafayev, ağır atletika yarışlarının işqlandırılmasında əməyinə görə “İdman Azərbaycan” kanalı və “AAAF Media”, həmçinin ustad ağır atletlərdən ibarət yığma komandamızın baş məşqçisi Oktay Muxtarov bu xatirə hədiyyələrinə layiq görülüblər.

Yarışlar isə maraqlı mübarizə şəraitində keçib. Körpücük üzərinə ilk olaraq qadınlar çıxıb. Toplam 157 kq (66+91) nəticə ilə 236.45 Sinkleyr xalı qazanan Səbinə Əzimova bütün rəqiblərini üstələyərək, qızıl medala sahib çıxıb. İkinci yeri toplam 141 kq (63+78) nəticə və 222.76 xalla Mərziyyə Məhərrəmova, üçüncü yeri isə toplam 157 kq (71+86) və 220.97 xalla Gülçin Əlizadə tutub.

Kişilərdə fəxri kürsünün ən yüksək pilləsinə Rövşən Fətullayev çıxıb. IV İslam Oyunlarının bürünc mükafatçısı olmuş atlet bu yarışda toplam 360 kq (160+200) çəkinin öhdəsindən gəlib və 399.92 xalla turnirin qalibi adını qazanıb. İkinci yerə toplam 274 kq (121+153) nəticə və 384.81 xalla Məhəmməd Məmmədli, üçüncü yerə isə toplam 288 kq (127+161) nəticə və 372.04 xalla Kənan Əliquliyev layiq görülüblər.

Son olaraq medal mübarizəsinə ustad ağır atletlər qoşulub. Toplam 233 kq (103+130) nəticə və 346.98 xalla Zəfər Tağıyev yarışın qalibi olub. İkinci pillədə toplam 150 kq (70+80) nəticə və 339.05 xalla Akif Alıyev, üçüncü pillədə isə toplam 255 kq (110+145) nəticə və 335.92 xalla Natiq Həsənov qərarlaşıb.

Bütün yarış iştirakçıları və qalibləri təbrik edir, uğurlar arzulayırıq!

Qadınlar

N Adı Şəhər Klub Çəki Birdən Təkanla Toplam Sinkleyr
1. Əzimova Səbinə Lənkəran Zirvə 51.30 66 91 157 236.45
2. Məhərrəmova Mərziyyə Goranboy Zirvə 48.20 63 78 141 222.76
3. Əlizadə Gülçin Qazax Zirvə 56.40 71 86 157 220.97
4. Rzazadə Lalə Lənkəran Zirvə 56.70 65 83 148 207.55
5. Vəliyeva Günel Xırdalan Zirvə 59.50 62 77 139 188.81
6. Qarayeva Selcan İsmayıllı Zirvə 43.00 45 58 103 178.85
7. Hüseynzadə Fidan Lənkəran Zirvə 66.30 60 80 140 178.04
8. Mirzəzadə Fidan Bakı Təhsil 57.30 53 68 121 168.48
9. Mayılova Səma Xırdalan Zirvə 53.50 49 63 112 163.57
10. Qurbanova Leyla Lənkəran Zirvə 50.14 40 48 88 135.12

 

Kişilər

N Adı Şəhər Klub Çəki Birdən Təkanla Toplam Sinkleyr
1. Fətullayev Rövşən Lənkəran Zirvə 99.5 160 200 360 399.92
2. Məmmədli Məhəmməd İsmayıllı Zirvə 63.3 121 153 274 384.81
3. Əliquliyev Kənan Lənkəran Zirvə 72.4 127 161 288 372.04
4. Xəlilov Kənan Neftçala Zirvə 64.5 124 130 254 352.32
5. Əliyev Füqan Lerik Zirvə 67.9 110 148 258 346.35
6. İbrahimli Paşa Lənkəran Zirvə 68.7 118 140 258 343.86
7. Rzazadə Ruslan Lənkəran Zirvə 60.7 104 130 234 338.13
8. Qasımov Rüstəm Lənkəran Zirvə 60.6 102 131 233 337.07
9. Babayev Tarmenxan Şərur Təhsil 83.2 131 150 281 337.07
10. Alıyev Elmar Bakı MOİK 55.1 95 122 217 336.37
11. Məmmədli Azər Lənkəran Zirvə 150.0 0 0 0 0

 

Ustadlar

N Adı İl Şəhər Klub Çəki Birdən Təkanla Toplam Sinkleyr
1. Tağıyev Zəfər 1973 Samux Zirvə 75.80 103 130 233 346.98
2. Alıyev Akif 1958 Bakı MOİK 56.20 70 80 150 339.05
3. Həsənov Natiq 1977 Bakı AZAL 89.50 110 145 255 335.92
4. Quliyev Səddar 1950 Sumqayıt Zirvə 78.70 68 90 158 335.09
5. Zeynalov Nizami 1973 Gəncə Təhsil 57.80 85 100 185 327.43
6. Məmmədov İltifat 1965 Bakı Neftçi 91.70 77 105 182 265.46
7. Əkbərov Emin 1973 Sumqayıt Zirvə 79.00 85 95 180 262.19
8. Əliquliyev Teymur 1968 Lənkəran Zirvə 84.50 75 96 171 251.23
9. Nəsrullayev Murad 1977 Lənkəran Zirvə 81.00 60 105 165 227.85
10. Həsənov Məlikməmməd 1960 Sumqayıt Zirvə 81.90 50 68 118 202.13

 

The requested album cannot be loaded at this time. Error: OAuthException Code: 10, (#10) Application does not have permission for this action The requested album cannot be loaded at this time. Error: OAuthException Code: 10, (#10) Application does not have permission for this action
Paylaş
Şərh yaz