15-25 oktyabr tarixlərində Albaniyanın Dürres şəhərində keçirilən yaşı 20 və 23-ə qədər olan gənclər arasında ağır atletika üzrə Avropa birinciliyində iştirak etmiş yığma komandamız Vətənə dönüb. 37 ölkədən 400-dən çox atletin mübarizə apardığı yarışda atletlərimiz 9 medal – 3 qızıl, 4 gümüş və 2 bürünc medal qazanmağı bacarıblar. Bu nəticə ilə Azərbaycan komandası yaşı 20-yə qədər gənclər arasında medal sıralamasında yüksək 4-cü yeri tutub və kubokla mükafatlandırılıb.
Dünən axşam Bakıya qayıdan komandamız hava limanında coşquyla qarşılanıb. Onları qarşılamağa gələnlər arasında çox sayda ağır atletikasevər, digər milli komandalarımızın üzvləri, valideynlər, idmançıların yaxınları, mütəxəssislər, federasiya rəsmiləri olub. Avropa birinciliyinin qalib və mükafatçıları, həmçinin məşqçi heyətinə gül dəstələri təqdim olunub. KİV-lər uğur qazanan komandanın üzvləri və baş məşqçidən yarış barədə açıqlamalar alıb, təəssüratlarını öyrəniblər.
Qarşılama mərasimindən foto görüntüləri sizə təqdim edirik:
